Miò Dio, e ricchezze di a terra
E déste a chi n’era più degnu.
A noi prumettiste u to’ regnu,
A pattu d’un fugghie a to’ guerra.

A noi un ci déste casale : 
Pe’ risaltu a i nostri fratelli,
Tu ci creaste puverelli
Cum’e picchî nant’un scugliale.

Ma ci déste orecchie per sente, 
E ci déste l’occhî per vede,
In core un zìnzicu di fede,
Amica e nimica la jente.

Poi ci diceste : - andate puru;
A terra giràtela in tondu;
Ma un v’affezziunate a stu mondu,
Ch’avete un tesoru sicuru.

E noi, Signore, èmu luttatu,
Senz’abusà di lu to’ nome.
Ma temu chi l’Altru un c’insome
Dopu avè tantu tribulatu.

A rombu d’andà pe’ a to’ fede
Tra li campi e sottu a le stelle,
Èmu fattu sogni a curbelle
E ghié nostru ciò chi si vede.

Anticipendu lu to’ regnu, 
Ci simu pasciuti di fole.
Emu fattu nostru u to’ sole
E datu a nostr’anima in pegnu.

A inghenà sunetti e canzone
E ludà le to’ creature,
Quella ch’à più belle fatture
Ci à distrattu for di ragione.

U to’ mondu, é vera, é gattivu,
E un l’averebbimu ascultatu;
Ma troppu bellu l’hai creatu,
E u nostru sangue é troppu vivu.

Or tu cambialu, o cambia a noi,
O coglici a u fiore di l’anni,
Che no’ pàghemu i nostri danni
Murendu cum’e i santi eroi.