Tutelare, per sopra e tombe
Speperse di li nòstri mòrti,
Per sopra a l’òrte chi l’avvinghienu,
Ecculu, s’alza!


S’alza a l’usciu di li paisòli,
Duv'ella finisce a pianura,
Senza paura, e l’incuronanu 
I primi nuli.

S’alza e fra li nudosi tronchi
Di li cavoni e di l’olivi
U so fustu appinatu e fùsulu 
Spicca più sciòltu.


Falchetti cun topi-marini
S'aggròttanu ind’i so’ tufoni,
E quassù, sottu a l’alta cupula
E tre campane.

“Ave Maria gratia plena...”
Principia a grande versu u mare.
A mezana dòpu cuntìniva 
E compie a chiuca.

Cusì murmòranu pietose
Un salutu a l’alta Signora 
Chi fu mamma a la nòstra Patria,
Maria Regina.

E d’intantu, ognuna a sso’ tornu,
Quand'ellu vene un ventulellu
Palpettanu e per aria vibranu
Un nome: Còsta.

Còsta! Ssu nome u bronzu elettu
Ch'ellu ha furnitu u cavalieru,
U bronzu elettu u pòrta in lettere
Fini-sculpite.

O cavalieru generosu,
Tu ghiere l’anghiulu custòde 
Di Castellana, e la sapìanu
I tristi Mori.

Solu nantu a lu to’ cavallu
Li vai incontru in Vallicone,
In Rusticaccia, e si ne scappanu
Per to’ valore.

E Teodoru chi a Furtuna
C’imprestò pe’ re face contu
U cavalieru testi ‘olcanicu
Di stu cunfine,

U cavalieru arditu e bellu 
Chi u gluriosu San Bastianu
Santu justu di e guerre nòbili
Predilegìa.

Or ste campane che tu desti 
Per sunà preghere e battaglie 
Da duicentu anni t’ammentanu 
Ai purfigliòli.

Ma sò belle vecchie e tre campane:
Un'asta manca, una traccòlla;
I tre mastavelli si facenu
Legni-tarlati.

Sò belle vecchie e tre campane:
Prestu seranu ammutulite 
Sò belle vecchie e chi l’invecchianu 
Un sò li tempi.

Un sò l’annate asseculate
E tantu pocu a malacura,
Ma le duglianze chi l’occùpanu,
I foschi dòli.

Perchì, si li jorni di festa
Una manu e sbattagliulèghia,
Unn é più manu d’òmi liberi,
Di Còrsi veri.

Perchì si l’aria ci circonda
É sempre chiara cume prima,
Un sona più disottu à l’ìmpiti
Di la Rivòlta.

U spiritu vecchiu di Cirnu
Dòrme cun sonnu di scugliale;
E s’òmu sente qualchi fulmine 
Sò l’elezzioni.

I figliòli di la muntagna,
I figliòli di la marina
Da mani strangere ricevenu
A so’ pruvenda.

Chì a genìa fosca di Francia
Per quindi ha stestu u tristu volu,
E li merli franchi di Còrsica
Avà sò galli.

E quandu da lu campanile 
Sbattagliulèghianu e campane
Per chiamà guerra, tutti credenu 
A banghigliacci.

E quandu inversu a fòrte Roma
E campane mandanu un lagnu,
Òmu crede ch’elle salutinu 
A Frassinecchiu.

Tu, Campanile snucculatu,
Cume un ditu puntatu in celu
Stai a signà lu patrimoniu
Ch’un si rinnega.

Ma dimmi, dimmi ò Tutelare
Chi t’alzi per sopra a le tombe,
Sentinella arritta da seculi
E ferma in pòstu,

Ò Campanile, in l’aria netta 
Dirittu e sciòltu cume un pinu,
Chi pensi, e quand’elli t’avvìnghienu 
I primi nuli?

-A te pueta pòssu dilla 
Chi t’arrimenti lu Passatu:
Finch'ellu firmerà petràculu
Di st’ossatura,

Eo cureraghiu ciò chi resta
Di gloria e d’onore in sti lòchi,
E custudisceraghiu i tumuli
Di l’antenati.

Evucheraghiu i tempi andati
Ch'un pòpulu sanu smentèca 
E chiameraghiu ad elli simile
Un avenire.

Chiameraghiu cun tempurali,
E cun serenu, e cun sulìa,
Finch'eo m’arrizzeraghiu nùsculu
A Redenzione.

Chiameraghiu, e lu miò rimbeccu 
S'alzerà sempre accusatore,
S'ellu mi resta un pezzu d’anima,
Una campana!

“ Si parla in sta puesìa di u Cavalieru Filippu-Maria Costa chi fu fattu conte da Re Teodoru. Stava in Castellana di Muriani duv’ellu esiste sempre u so’ palazzu, òghie palazzu Pierantoni. E si conta sempre cum’ellu fece, solu, una vòlta, turnà in daretu una banda di Mori avanzati versu u paese. ”