Si sente dì ch’isse France
Cun tutta l’aghja latina
Patenu listessa angoscia
È stessa sorte mischina
Lu dirittu s’hè chjinatu
Guarda cresce a so ruvina

Quallà ci regna oramai
L’inghjustizia è lu terrore
Lu gallese indinuchjatu
Di pettu à qualchì invasore
Chì s’hà fattu i so bastioni
O funestu disonore

Vechju mondu di l’Imperu
Titanu di l’Occidente
Tù chì fusti da la Croce
È da lu Geniu putente
Cumu chjami lu to male
Chì ti rode carne è mente

Duve sò tutti i to orgoglii
Ch’ellu temia u Levante
I to spiriti suprani
Sia Moliere o Dante
È tutte le to vittorie
Da Poitiers sinu à Lepante

Discetati vechju mondu
È ch’ellu curi u to male
Lu Davide di ‘ssi ghjorni
Cù la spada è lu fanale
Quale purterà lu farru
Pettu al nemicu murtale

Quì da lu nostru isulottu
Usservemu cun penseru
Fiurisce cardi è tanghi
Per lu Cuntinente interru
È stallassi un altru Diu
Cunquistadore è guerrieru

È tù Cirnu disgraziatu
Fà turnà li Cinarchesi
I Colonna, i della Rocca
Contr’à Mori è Genuvesi
L’Istria è li Sampieru
Pettu à li vittoli arresi

Sianu li nostri eroi
Cume sò le nostre torre
Arritte sopra la costa
Da resiste à l’invasore
Fatte da listesse petre
Di e ghjesgie di lu Signore

Bustanicu, Ottore 2022.

Niculaiu Battini