Passava vivu mezu à i morti
‘Sse casi sfundate duve ridianu tandu
Mille zitelli currendu sottu à l’ochji d’un babbu
Affiancu à lu caldore d’un focu
È la prisenza d’una mamma chì curava
È d’una vechja chì tessia
Oghje hè ruvina
È lamaghje
È tanghi

Cumu spiegà ‘sse cosi
Chì lu fiatu vivu d’una razza fiera
Possa in menu d’una vita d’omu
Sparisce quant’è la cera bianca è dura
Chì sdrughje pettu à la fiara
Ardente è spiettata
Di lu tempu chì passa
È soffia
È spulla

In ‘sse piaghje duve pascianu tandu
L’animali falati da ‘ssi muntagnoli rustichi
Crescenu oghje magazegni mericani 
È lochi duve precanu li macumettani 
Mezu à li vechji pinzuti
Chì compranu li lochi
Senza muntagnoli
Spariti
O morti

Ma 'ssu ceppu maltrattatu
D'un'uva feconda, fruttiva, vechja quant'è Roma
'Ssu calzu rusticu è accannitu
Chì stancia a so sete cù nudose radiche
U socu à l'aggrottu è arditu
Fieru, forte è degnu
È capiciutteghja
Sottu terra
Prufondu
Aspetta
U ghjornu di a risurgenza

À la razza corsa ch'ùn vole more
Bastia, 03 ghjennaghju 2023, Petraforte