In a so Etica Nicomachea famosa, à u libru IV, Aristotele cuntinueghja u catalogu di e virtù chi permette d’accede à a vita bona, u benvista è l’eccellenza individuale. A magnanimità ( da u latinu  magna anima chì significa « grande anima ») hè una di quelle virtù e più cumplete, è ,in un certu modu, a virtù chi necessita d’acquistà tutte l’astre.
L’omu magnanimu sà ch’ellu hè nant’à a via bona, è cultiveghja un rispettu di sè stessu è li per-mette di serve à cummunità incù à a totalità di a so personna chì, luntana di a vergogna, face tuttu à l’apertu di manera misurata, in rispettu à l’altri. Ghjè u tippu di l’aristocrata, di l’omu nobile chì trascende à ricchezza ò a nascita stessa, l’omu chì ghjunghje à u più livelli di e so capacità incù a capiscitura di tutte e virtù. Mà per i grechi a virtù va sempre battendu in core à a cità è l’omu magnanimu deve sempre esse in armunia incù i soi. In tuttu l’omu magnanimu abbraccia tutta a realità perchè ghjè sempre u maestru di a so vita, u maestru di e so azzione : u maestru di a so felicità.

 A magnanimità a rapportu incù e cose maiò cum’è u so nome à face sente. Un importa nunda ch’ellu sia a disposizione in sè o quellu ( omu) chì hè sottu à a dispusizione. Ci pare magnanimo l’omu chì si dice meritosu di grande cose per ellu stessu. Ùn si dice micca merità grande cose l’imbecile, o u pazzu, perchè né unu nè l’altru ùn participeghjanu à a virtù.

  L’omu magnanimu, senza dubbitanne, hè un omu cum’è quellu ch’avemu discrittu ( quellu ch’ùn hè meritosu che di cose minime, l’omu magnanimu ùn ne face parte). A magnanimità ingrana, cum’è a bellezza incù i corpi maiò, eppuru l’omi bassi, ancu bè vistuti, ùn facenu parte di i belli.

 Quellu chì si dice meritosu di cose maiò senza meritale hè chjamatu un omu vanitosu. L’omu modestu ùn hè micca simile à  tutti i vanitosi. Mà quellu chì sminuisce u so meritu hè un pusillanimu, s’ellu merita veramente cose maiò, o e cose medie , è ancu e cose e più basse. S’ellu hè veramente meritosu di cose maiò perchè face nice d’un meritale ?

L’omu magnanimu  ùn si dice meritosu che di e cose ch’ellu merita veramente, ch’elle sianu cose maiò o cose basse. S’ellu si dice meritosu di e cose e più alte, u so oggettu un va micca nant’à a cosa stessa. Si dice chì u meritu stà vicinu à u bè, è quellu altissimu oggettu u punnemu cum’è un offerta à i dei, hè cunsideratu trà l’omi degni cum’è una cosa trà e più belle cose chì sianu :  l’Onore hè quella cosa, u più bellu di i bè esterni. L’omu magnanimu stà vicinu à e cose onorevule è luntanu di e cose vargugnose. L’omi magnanimi si cunsidereghjanu elli stessi cum’è vicinu à l’onore, in rapportu incù u so meritu veru. U vanitosu soprestima u so propiu meritu mà micca l’omu magnanimu. Quell’omu si dice meritosu di cose maiò, è postu ch’ella hè virtuosu, hè sempre meritosu di cose nobile è eccelente.

 Ci vole chì l’omu magnanimu sia veramente bonu. È sè l’omu magnanimu l’hè veramente deve esse grande in ogni virtù.  L’usi sò chì nissun omu ùn fughje à u scappa scappa, è ùn face mai cose inghjuste : à chi scopu farebbe cose inghjuste è micca solu cose nobile ? Sarebbe ridiculu chì l’omu ùn sìa un omu di bè. U gattivu ùn hè meritosu di nissun onore, l’onore hè a ricumpensa di i virtusoi, è face regula trà l’omi di bè.

 A magnanimità hè l’ornamentu di e virtù, perchè e face cresce tutte, è ùn pò ingrandassi fora di quelle. À partesi da quì, in verità, a magnanimità hè qualcosa di difficiule, è ùn hè pussibile ch’incù una perfetta virtù sana.

 Di fattu l’omu magnanimu si vede sopratuttu in rapportu incù l’onore è a vergogna ; quandu riceve l’onori maiò  fra mezu à l’omi di bè risente una gioia misurata, cum’è l’onore ùn pò andà senza una virtù sana,  hè ubbligatu di meritali. L’onori resi da omi bassi o da omi qualunque, ùn ne derà casu, perchè ùn hè micca degnu di quelle cose, perchè ùn sò onorevule, hè dalli queste cose rivene à trattalu in modu inghjustu, è agiscerà di manera analoga per a vergogna. Tene sopratuttu à l’onore, è  a prò di tuttu ciò chi riguarda a richezza ò u putere puliticu, a furtuna ò a sfurtuna, agisce in modu misuratu, è pocu impreme in chi modu si prisentanu à ellu, ùn guderà micca in eccessu di a bonna furtuna è ùn si vergugnerà in eccessu di a sfurtuna. Mà ancu in rapportu à l’onore ùn hè micca smisuratu , ancu puru s’ellu hè a più alta cosa. ( U putere è a ricchezza sò bramati per via di l’onore ch’elle dannu.) Sè per certi l’onore hè una cosa minima, allora nunda ùn hà valore. Quelli sò detti disprezzanti.

Ci pare chì a furtuna va di paghju incù a magnanimità. L’omi di ceppu sicuru sò detti meritosi d’onori, cum’è l’omi di putere è l’omi ricchi, perchè suprananu à tutti è chì appare cum’è una bella cosa. E cose di furtuna facenu l’omi magnanimi, mà duverebbe esse solu l’omu di bè à esse onoratu. Quelli chi si dicenu meritosi senza esse omi di bè ùn ponu esse chjamati veramente omi di bè. Senza virtù tutale ùn hè pussibile d’esse meritosu, è certi chì so furtunati da a sorte, si permette d’esse sprezzanti è orgugliosi senza meritu. Senza virtù ùn hè cusì faciule di purtà i donni di a furtuna. S’ell’ùn sò capaci di virtù disprezzanu l’altri, si credenu soprani à tutti è facenu cum’è la li ghjunghje. Imiteghjanu l’omu magnanimu senza essere veramente, agsicenu senza avene a facultà, eppuru senza avè a virtù, disprezzanu l’altr’omi.

 L’omu magnanimu, ellu, pensa in modu ghjustu ( in rapportu à e cose cum’elle sò veramente), a multitudine pensa di manera azzardosa. In più, ùn hè micca di quelli chì correnu pocu periculi o di quelli chì piacenu à corre i periculi, mà di quelli chì piglianu risichi maiò per mutivi impurtanti, è cusì ùn risparmia micca à so vita pinsendu ch’ella si deve cunservà sempre sana sana. Agisce per u bè di  tutti, mà si copre di vergogna à riceve u bè di tutti, u primu perchè hè un segnu di superiorità persunnale, è riceve hè u segnu di a superiorità d’altrui. Va spessu rende di più di quantu hè debbitosu, cusì l’astru si rammentà d’ellu è si senterà ubbligatu d’agisce bè à prò d’ellu. L’omi magnanimi parenu ricurdassi solu di quelli à quale hanu resu un serviziu è micca di quelli chì ne devenu unu. Quellu chi riceve vale menu chi quelli chì dà, è l’omu magnanimu vole tene à suprana. Hè felice d’ascultà u piacè ch’ellu hà fattu, è li dispiace di sente parlà di u bè ch’ella hà ricevutu. Simile à Tetis ch’ùn dice i bè fatti  ch’ellu hà fattu à Zeus,  o i Lacedemoniani ch’ùn dicenu à l’Ateniani i bè fatti ch’elli li hanu rigalatu, mà solu i bè fatti ch’ella hanu ricevuti.

 In stu sensu, l’omu magnanimu ùn dumanda aiutu à nimu, tene a suprana senza svià, è si ferma supranu assai à tutti quelli chì si dicenu meritosi senza meritu, o quelli chì a dicenu in rapportu incù i donni di a furtuna, mà si stà misuratu assai. Esse supranu hè una cosa augusta mà una cosa difficiule di pettu à l’omi maiò, hè faciule di pettu à l’omi debbuli, per quessa ch’ellu ferma misurati di pettu à quelli medesimi ;ghjè sporcu di sfugassi nant’à i corci. Cusì l’omu magnanimu ùn va micca versu e cose induve sò l’altri ch’hannu a prima piazza. Va pianu, mà micca s’ella si prisenta ùn affare impurtante ; a spressu agisce nant’à poche cose mà e cose maiò è quelle di riputazione maiò. Dice u so oddiu a ghjornu chjaru,è u so affettu in u stessu modu ( perrò, piatta sempre à so paura, e dice a verità piuttostu chì l’opinione cummuna) parla è agisce a ghjornu chjaru ( simile allora à quelli chi parla sinceru è in modu capiscitoghju è veru, fora di quandu macagna parlendu à a multitudine).

 Ùn pò campà in schiavu di u campà d’altr’omu, s’ell’ùn hè un amicu. Tutti i vezzighjatori prufessionali è i bassi vezzighjatori, ùn ha nissun admirazione, perchè nunda ùn hè cusi grande in a so visione, mà ùn hà mancu gattivu rimbeccu : ùn hè micca magnanimità d’avè rimbeccu di pettu à e cose pessime o d’aguardale in catterochju. Ùn si piace micca à u puttachju, ùn parla nè d’ellu nè di l’altri, ùn da nissun attenzione à biasimà ò a ludà, da quì ùn parlà mai in male mancu di quelli chì l’odiannu, s’ell’ùn hè micca briagu ò in un statu eccessivu. In rapportu à e piccule necessità di a vita hè pocu à lagnassi è a dumandà aiutu. Ùn s’infuria mai per e cose chi l’accadenu. Preferisce e cose belle è inutile, piuttostu chi e cose utile mà goffe. Per ellu, vale megliu esse autarticu ( indipendente). A dimarchja di l’omu magnanimu hè misurata è tranquilla, a so voce hè forte, è parla sempre di manera stabile è unita. Ùn hè mai infuriatu, è ghjè scarsu s’ellu hè eccitatu in qualche modu, di fattu ùn hè mai troppu vehemente. Parlà d’una voce di narpia, è esse eccitatu ùn hè micca degnu d’un omu magnanimu.

L’omi bassi ùn parrennu  micca d’esse nant’à una gattiva via ( nè d’agisce male). L’omu pusillanimu, puru degnu di belle cose, si priva ellu stessu è da l’impressione d’esse una pessima personna perchè si pensa immeritosu di cose di bè, è s’ignora ellu stessu. S’ell’ùn era cusì, cercherebbe e cose di quellu hè meritosu, essendu ùn omu di bè. Quell’omi ùn ci parrennu pazzi, mà sopratuttu dubbitativi. Quell’opinione d’elli stessi ci pare fatta in quattro trè sette, tutti quelli tralascianu e cose di quelle sò degni , alluntanendusi di e belle azzione è di i belli morsi perchè si ne credenu indegni, è ghjè listessa incù e cose apparente. I vanitosi veri sò ignoranti d’elli stessi, apparenu degni di tuccà à e cose onorevole mà li sò interdette, pure mettendu in ordine à so apparenza è l’attitudine o sant’altre cose superficiale. Volenu chì i so donni di furtuna sianu bè visibili, è dicenu di quelli ch’elli sò degni d’onore. Hè antitecu incù a magnanimità a pusillanimità di più chì a vanità, perchè a pusillanimità si vede più spessu è ghjè più brutta in tuttu.

Ghjuvan Francescu Luciani