L’Omi sinceri s’impegnanu inde una lotta, qualsiasi l’epica, u locu, a razza, a causa o ciò ch’è vo vulete, perchè sò conni è ghjovani, niscentri, generosi, nucenti, idealisti, bramosi d’edificà qualcosa di novu chì curispundi à a visione pazza è cumpletamente falza ch’elli si facenu di a Verità. Credenu à a Grende Sera, stu velenu putente, sta ruvina di l’intelligenza. E po, da a teuria, si lancianu in a pratica. Volenu tuccà a materia. Piglianu a realità à duie mani, a scuzzulanu, a rompenu, l’impastanu. S’avvedenu tandu chì ciò ch’elli credianu biancu hè grisgiu, ciò ch’elli pensavanu dolce hè duru, ciò ch’elli imaginavanu veru hè sbagliatu. È tandu quì o zitè, ci sò duie scole. Ci sò i puri chì rientranu in casa è chì riflettenu un pocu nantu à a situazione, chì si dicenu quantunque ch’elli sò stati belli conni ma chì si cunsolanu cù u fattu ch’elli eranu sicuri di fà bè. Per quessi custì s’agisce à l’oramai di rivede a cosa sottu à un altru angulu. A via ch’elli avianu adupratu a tralascianu è atteppanu per d’altri chjassi, ma ùn piantanu di viaghjà.
Sò quessi chì sò veramente in cerca, chì anu una sete terrivule di scopre, d’amparà, di capisce infine i grendi mecanisimi chì conducenu l’umanità. A Verità nenzu à a causa. Mettenu u capu sottuterra è scavanu cù l’unghje è falerebbenu sinu à a nuciola terresta s’ellu fussi quessu u prezzu à pacà per tastà un pocu di sta Verità assuluta, l’essenza d’ogni esistenza.
È po ci sò l’altri. I tippi chì s’anu da cuntà d’altre bucie per scurdassi di e prime ch’elli si sò digià conte è chì l’anu da cuntà dinù à i più ghjovani chì venenu daretu à elli. Anu da intratene ‘ssa trappula, n’anu da fà una mitulugia, n’anu da fà un’identità suciale è anu da prusperà nantu à ‘ssu bellu pacchettu di merda, scunvincendusi di per elli ch’elli facenu qualcosa di storicu è d’immensu invece chì nantu à a sta grende marchja versu l’Assulutu si sò piantati elli. S’anu fattu u so castellu, cù i so servi, i so sbiri è ùn volenu più ripiglià a strada, per elli sò ghjunti. È chjamanu ciò ch’elli facenu cù e listesse parole ch’elli impiecavanu quand’elli participavanu à a Cerca, ma a Cerca l’anu abbandunata puru s’elli ùn l’adimettenu micca. Ùn a ponu adimette. Serebbe à u prezzu di a so bucia è a bucia dà sensu à a so vita. È l’Omu trà more è sbucerdà, preferisce sbucerdà. Hè nurmale. Basta à sapella. Per quessi a Verità ùn hà più nisuna impurtenza, à u cuntrariu hè periculosa è tandu hè megliu à mandalla via.
Hè cusì chè no pudemu vede, di più in più, legione è legione di ghjente in Corsica chì ùn anu più chè sta parola di naziunalisimu in bocca, è tuttu si pò fà è dì, à cundizione ch’ellu ci sia u stampinu naziunalistu. A peghju merda di a creazione hà da fà qualchì malfatta è l’hà da unghje di l’oliu santu naziunale, serà pè a Corsica, a nostra nazione cara. I soldi di a droga, per ella. A speculazione, per ella. I tradimenti, per ella. E carnavalate ghjudiziarie, per ella. Si pò fà tuttu simu naziunalisti, una bella mansa d’inculati corrutti è buciardi, ma naziunalisti, ego te assolvo profondus bastardum in nomine Patria.
È si portanu bè quessi, l’avvene li appartene chì i seguitanu battaglioni pieni di ghjovani acculturati à i quali li basta un corpus ideulogicu basicu bricculatu soprapiazza cun duie o trè cunnerie ch’omu avia sottu à a manu. Un calibru, casca bè postu chì ùn ci n’hè più bisognu. Un pocu di musica corsa, casca bè postu ch’ùn a parlemu micca sta lingua è chè no ci n’infuttimu per dì u veru. Qualchì leia cù u banditismu dinù per campà, ma capite hè pè a lotta chì i soldi sò per noi è a lotta simu noi tandu i soldi sò pè a lotta.
Vituperie.
Vi puderebbi arrecà unepoche di nuanze quantunque ma ùn ci vulerebbe micca à faticassi nun più. U cunfortu ci piace ancu à noi è u primu di tutti hè d’ordine inteletuale. Simu quì per parlà di e grende linee, di quelle ch’omu vede bè, micca per produce un analisi suciologica precisa.
Simu veramente una spezia bona per compie, ma ci vole à esse fieru quantunque di ciò ch’omu hè.
Francescu Maria