L’osse di i so antenati

Per tutti la notte vene
Ma chì più bellu destinu
Chè quellu di stà vicinu
À lu sangue di e so vene

È chì chjassi più beati
Da fermà attenti è fidu
À u tempiu di u so Diu
À l’osse di i so antenati

È chì solcu più sicuru 
Chè quellu duve si pone
Stintu, fede è tradizione
Pensà è dettu maturu

S’arricordi tuttu ognunu 
Ch’ogni mumentu campatu
Ogni fiatu hè ricalatu 
Da tutti quelli chì funu 

À chì banga eppò sumena
‘Ssi valori ch’ellu sappia
Erige nantu una chjappa
È micca nantu à la rena

Hà un tettu cù ‘sse legge
È lu fermu intempiamentu
Di castagnu hè d’accunsentu
Per nasconde è per prutegge

Puru se d’oghje lu crede 
Tene da fole ‘sse rime 
Credu ch’ùn sonu le prime 
À mintuvà questa fede 

Mancu l’ultime seranu 
E vulterà ‘ssa manera 
Di pensà l’anima vera 
Dopu l’inguernu u veranu 

Bustanicu, Marzu 2022.

Niculaiu Battini