U Banchettu in San Ghjorghju di i palatini aiaccini

Un tavulinu cun cinquanta ghjovanni di menu di quarant'anni. Eccu ciò ch'o eramu u 6 ghjennaghju scorsu in quella osteria famigliale di a bocca di San Ghjorghju. Senza cuntà l'altri numarosi passati in cor di serata da beie un colpu è intunassi una canzona corsa. Nè un'assemblea generale nè una gran messa, mancu appena. Simpliciamente una grande riunione di a sezzione aiaccina di Palatinu cunvucata in giru à un dress-cod di circustenza è valori essenziale di a nostra mossa : identità corsa, civilizazione, tradizioni, cultura, storia è passione per ciò ch'o simu noi altri Corsi.

I palatini d’Aiacciu è di u so circondu cumenciavavu à ghjunghje inde ‘ssu picculu albergu di famiglia, piazzatu à qualchì passu di l’usina di l’Acque di San Ghjorghju. Versu 7 ore di sera, cullava in l’aria di u stabilimentu un clima d’amicizia, inde u più puru stintu corsu ch’o vulemu prumove di mosse in mosse cù a nostra urganizazione. Storia, pulitica, attualità, ragioni diversi è varii, una canzona generale si ghjucava, cumposta da a voce di tutt’ognunu mezu à i bichjeri di vinu, u fumu di sicari è in canti in paghjella.

L’onore di piglià u primu a parola andò à Fabien Lanfranchi, memberu di a famiglia chì ci accuglia in quelli lochi garbosi è memberu meritente di Palatinu in Aiacciu. Un picculu discorsu nantu à un tonu d’ironia è di simpatia da apre stu bancchettu chì s’annunciava digià cum’è un veru successu. Da una cronaca attualizata di Giovanni della Grossa à l’evucazione di a bandera di Palatinu posta nantu à u bastione di a famosa Guardia aiaccina ch’omu cunnosce è chì n’hà fattu trimà più d’unu, surrisi è sguardi complici accumpagnonu st’intervenzione.

Po tuccò à Jérémy Palmesani, respunsevule di a sezzione d’Aiacciu, di sviluppà un prupostu chì ricullava à a genesi di l’opera di Palatinu, à a so amicizia cun u Presidente, Nicolas Battini, chì si mustrò cumossu quant’è silenziosu da st’omagiu fraternu ch’omu li fece, bichjeru in l’aria in tanti voti di salute è di furtuna.

Ripigliendu a parola, M. Lanfranchi a dede ghjustamente à l’iniziatore di a nostra dimarchja chì, inde u so dialettu di Boziu, salutò l’assistenza è addirizzò i ringraziamenti per l’accoglienza di a famiglia Lanfranchi, a prisenza massicia di i palatini aiaccini è di qualchì respunsevule ghjuntu da tutti i scorni di Cursichella.

Arricurdò à tutt’ognunu u sensu di Palatinu : prumove è valurizà un discorsu chjaru nantu à l’identità corsa, nuzione cumpletamente sparita di u paisagiu publicu per ragiò d’interdettu pariginu è bien-pensant. Fà chì tuttu ciò chì hè corsu fermi corsu è chì ciò ch’ùn hè più torni corsu. Fà chì a Corsica sia populata in maiò parte da i figlioli di e famiglie chì campanu quì dipoi seculi è seculi, difende a storia di i nostri antichi è falla cunnosce, difende è prumove i parlà d’issa terra, difende a famiglia chè n’emu sempre cunnisciutu noi altri ingiru à un babbu è una mamma, ramintà a natura cattolica di a nostra cultura pigliendu à contu ‘ssu magnificu sustrattu pacanu è prelatinu. Finalmente, difende ciò ch’o simu è ch’o vulemu stà. Una causa chì oghje cuncerna millaie è millaie di Corsi fidi à u so ceppu, naziunalisti o micca, di diritta o micca, ma tutti adduniti inde a vuluntà cumuna di difende a lascita di i nostri babboni è arcibabboni.

Un discorsu largamente sciaccamanatu è, pendente ch’ella s’arrizzava l’assistenza da salutà l’oratore, puntuatu da un Dio vi salvi Regina (vede a nostra videò in fondu d’articulu) cullatu da u fondu di e viscere palatine. Seguitò un mughju chè no femu nostru : Patria è Libertà !