Cosa hè Palatinu ?

Dipoi a creazione è l’attiva prisenza di u nostru associu nantu à u terrenu di a valorizazione storica è identitaria, si move cum’è una fiumara di cummenti è di ragioni. Una piena di tantu in tantu. Ci vole à adimette ch’o femu parlà, sia per bè sia per male. Fussi quessa u peghju sconciu, à tutti prechemu salute ! Serà forse chì ciò ch’o purtemu dice qualcosa à qualchì Corsu privu di parola dipoi troppu tempu inde st’ambiu consensuale chì regna oramai. A dialettica inghjenna, in ogni epica, forza, creazione è nuvità, per quessa omancu Marx ùn si sbagliava. È forse chi a nostra Cursichella, inde sta padula eletturalista ch’hè ridiventatu u paisagiu puliticu corsu ‘ssi pochi anni, n’hà più chè mai bisognu. Chì, puru se u nostru settore d’attività gira di modu essenziale intornu à a lingua corsa, a storia è e tradizioni d’issu paese, ci vole à ricunnosce chì a nostra manera d’esse è di prisentà a nostra azzione pò, di tantu in tantu, esse intesu cum’è u ribombu d’unepochi di valori. È, dimuci e cosi, face prò, assai prò. Quessa a ci ponu accertà i più di trè centu Palatini, ghjovani per maiò parte, chì urganizeghjanu ‘ssa dimarchja dipoi trè o quattru mesi d’attività sustenuta, un numaru chì cresce quante l’associu face rachjà è ch’ùn mancherà di cresce torna cù a nostra campagna d’adesione. Ma aderisce à chì fà ? Hè precizamente ciò ch’o vulemu spiegà.
 

Simu parechji à dilla quessa dipoi un mezu seculu. Pare evidente chì a Corsica sia di i Corsi. Puru, a definizione di ciò ch’o simu, cusì chjara inde u cuttitianu è a spuntaneità, subbitu si disturba inde u dibattitu publicu. Chì serà un Corsu ? Pare evidente pè u mondu sanu salvu quì. Dimu noi, in tutta umilità, chì e logiche universaliste è prugressiste ùn ci cunvenenu tantu. Nè a residenza, chì ci stanu i furesteri in Corsica, è sò parechji diceranu quelli, nè i valori, chì l’appartinenza à un populu ùn pò esse cunsiderata cum’è un’adesione à un corpu ideulogicu. Quale averebbe à stabilisce « i valori corsi » ? È quelli ch’ùn ci averianu da ricunnoscesi inde sti valori, serianu for di a so ghjente ? A verità, dimula, hè chì si tratta quì d’appartinenza famigliale è paisana. Luntanu da noi ‘sse caricature razziste, o sta pazzia di a purezza di u sangue, parechji di i nostri sò belli mischjati è trippa, cusì và u mondu, ùn emu nunda à discute d’issu suggettu. Ma puru s’omu tene da pazza l’edea scema di purezza razziale, quale pò rinnigà, fora di i jacobins universalisti (numarosi ancu inde l’autonomisti è l’indipendentisti), u carratteru essenziale d’un ceppu famigliale arradicatu in qualchì locu da definisce u Corsu ? 


È postu ch’emu parlatu di ceppu famigliale è d’arradichera, parlemu di ‘sse generazioni è generazioni di Corsi, i nostri antichi, i babbi di i nostri babbi, chì hanu datu à ste terre chè no tenimu caru nomi, forme, paisagii, stalvatoghji, canti : storia ! Anima ! Eccu, pensate bè chì u nostru putenziale di frequentabilità ne pò piglià un bellu colpu incù ‘ssi ragioni d’antichi è di passatu gluriosu. Ma chì vulete fà, omu hè cum’ellu hè è à core francu ùn pò stà mutu. Ùn pudemu piattà à nimu chè no simu fieri di a longa catena di fatti è di stalvatoghji lagataci da a grande fila di i nostri antichi adduniti. Una fiertà ch’ùn si priva di rivindicà u nostru ricusu d’ogni vittimizazione, velenu putente cusì spartutu dipoi a generazione di u settanta. Un velenu chì si pò dà i vestiti d’una medicina ma chì, una volta ben prisente inde l’urganisimu, ùn manca micca di suchjà forza è salute. Vittime ? Culunizati ? Mai ch’ella sia. I nostri antichi sò eroi. Ùn ci si pare micca d’avè bisognu di circà tantu tempu per truvà in a storia corsa, è quessa vale per ogni generazione, una manata d’omi o di donne curagiosi chì scuzzulanu e certitutine è e duminazioni di u so tempu da fà valè l’intaressu supranu di a Corsica è di a so ghjente ! È ciò chì pare bè inde u passatu, ci si pare bè à noi pè u prisente è l’avvene.


Hè digià un affarone di dì è di difende ste cosi. Palatinu hà apertu una longa strada da intraprende, bella sicura, ma tandu u fine hè di più inde u parcorsu fattu chè inde a destinazione bramata. Bisognu c’hè in Corsica d’issu pensà arradicatu à l’anima corsa è attempu oppostu à ogni forma di pienghjeria è di cumpromissioni cù e forze di stirpera di l'identità ch’omu ci prumette. Palatini, à cavallu !

Niculaiu Battini