Cultura ? Storia ? Identità ? Abbassu u ponte di Casaluna !

Pietà, o Santu Prugressisimu, pè e nostre ghjesgie viote è miserie, pè i nostri ponti vechji è fracichi ch’ùn ghjovanu più à nunda, pè i nostri paisoli à l’abbandonu è disertati, pè a nostra lingua à l’agunia è vestica d’un mondu sparitu, pè a famiglia tradiziunale di babbu, mamma, babbone è mammone, culpita da l’assalti di l’industria woke, di Sandrine Rousseau è di i so relais parigini o impinzutiti, pè a storia chì ci ferma, falzificata un pocu di più tutti i ghjorni da piace à a benpensenza parigina, pietà, pietà, pietà per stu vechju mondu corsu addurmintatu chì puderebbe discitassi furiosu di l’arrubecciu generale ch’omu urganizeghja contru à tuttu ciò chì li ferma di sputicu è d’arradicatu.

Ùn pudia cumencià st’articulu senza intunà l’indispensevule prighera à a nova religione di u Prugressisimu. Tuttu si ne và di male, ogni pezzu di Corsica chì ci leia cù u Passatu è a Tradizione sparisce pianu pianu, à quandu sottu à u bettone di qualchì prumutore indipendentistu, à quandu sottu à quellu di u so assuciatu pinzutu, ghjunghjenu furesteri è figlioli di tutte e mamme à schere per battelli sani in pruvinenza d’ogni sponda di u Mare Nostrum, quella di sopra quant’è quella di sottu, eppuru l’autorità publiche hanu avutu l’idea incredibile di fà cascà sta simana ‘ssu vechju ponte di a Casaluna, in Valleruste, chi hà intesu nantu à e so arche passà ancu e culonne di i naziunali pendente u XVIIIe seculu. Mi diciarete, si face pè a cultura. Bella sicura si face, ùn diceremu micca u cuntrariu. Sapete chì quì, simu à stuzzicà u vespaghju ma senza mai fanne troppu. Puru, ùn c’era manera quand’emu amparatu quella malfatta di u ponte di a Casaluna, di fà u paracone cun u altru fattu d’attualità vicinu. 

In u mentre chì e petre trè volte centinare di u ponte sò cacciate à colpu di tractopelles è altre mascine ch’averianu à rifà un pocu ‘sse strada muntagnole, emu passatu un annu à apre u ghjurnale per leghjeci articuli di prumuzione varii à favore di a candidature da capitale auropea di a culture di Bastia in 2028. Sapete, a voglia stessa ùn hè mancu gattiva. S’ella era di prumove è di valurizà l’anima vera di a Corsica, a so lingua, i so usi, e so famiglie, a so storia è tutta a memoria di l’antica razza corsa, perchè micca ? Puru s’omu sà chì i valori di l’Unione Auropea ùn seranu mancu à pena da u latu di tuttu ciò chì s’arradicheghja quì dipoi parechji seculi è chì a so prifarenza và suvente versu ciò chì hè ghjunta arimane, sopratuttu se l’affare ghjunghje da a sponda meridiunale. Ghjustu appuntu, hè u fondu di ‘ssa dimarchja. Hè scrittu inde u cartulare prisentendu “Bastia 2028” u so fine veru :

“Elle devrait aussi inventer une façon de mobiliser les citoyens, de créer des opportunités de rencontres avec le patrimoine et l’art, avec la possibilité pour chacun.e de se créer son propre chemin vers l’art et la culture.”

Rimarcherete ancu voi l’agredevule impiecu di a scrittura inclusiva, st’ultima pazzia pinzuta nata inde u cerbellu di qualchì burghese citatinu troppu techju chì manca d’attività fisica. Aspettate cari lettori, ùn ridite micca troppu è ùn vi dumandate micca perchè ch’o vi parlemu di quessa, lasciateci esponevi a seguita :

“Comment la Corse peut-elle promouvoir, dans le cadre de cette candidature, une conception de l’identité qui ne la réduit pas et ne l’enferme pas dans des déterminismes mais, comme le dit Wajdi Mouawad : «une route, un chemin, qui nous fait, toi et moi, nous ressembler un peu ».”

Tandu noi altri chì simu prugressisti pocu è micca, è struiti ancu menu, ùn sapemu micca qual’hè stu Wajdi Mouawad. Ma ciò chè no sapemu, hè chì quessa l’indiatura bella corsa hè stata suvvenziunata à l’altura di 100.000 euri da a Cullettività secondu un annonciu di u Presidente Simeoni publicatu u primu aostu di cust’annu. Un pocu prima ch’omu senti cuncernendu sta candidatura, pendente u votu di suvvenzione inde l’Assemblea di Corsica stessa, quella cacciata poca naziunalista :

“La Corse n’est jamais autant elle-même que lorsqu’elle est ouverte au monde.”

Hè detta. Sparimu pianu pianu. Omu ci rimpiazza. U nostru mondu sprufonda dipoi cinquant’anni. A soluzione ? Aprimu torna !

Tandu ci dumanderete, ma perchè fanne un cuncistoriu ? Lacate puru ‘ssi burghesi impinzutiti fà cum’ella li pare, scrive a so écriture inclusive chì nimu pò ammestrà è parlà di a Corsica cum’è d’un terrain-vague chì appartene à u primu ghjuntu, ch’ellu si chjami Don Petru o Wajdi. Hè vera, serebbe una rimarca pertinente. Ma nunda ci pò permette d’accittà chì, in u mentre chì i soldi publichi sò investiti à favore d’affari cum’è quessi -da valurizà u pensà è u fà chì sradicheghja tuttu ciò ch’hà una radica pè chì e classe asgiate si sintinu un pocu generose è benfattrice nantu à u spinu di ciò chì ci ferma d’identità-, i tractopelles sò mandati à Casaluna per falla finita cù stu vechju ponte corsu di petre è di legne ch’elli cunniscianu digià l’arcibabboni di i nostri arcibabboni senza chì nisun mezu sia messu in piazza da mantenelu. Ùn simu più nantu à ‘ssu chjassu storicu di a salvezza corsa, di a ricerca è di u mantenimentu di ciò chì ci dà esistenza è identità. Ùn ci n’hè chè per l’autoroute prugressistu è benpensente. Sicuramente, evviva sì u ponte novu ch’elli facenu di bettone. Simu à favore di u sviluppu di u rurale, simu pè a fibre, simu per l’accessu, simu per a tecnulugia è a mudernità… Ma inde a tradizione ! È senza fà spazzosa di tuttu ciò chè no simu. “Une route, un chemin” cum’ellu dice Wajdi, ma per contu nostru quellu di a cursitù, di a paisanità è di a Tradizione, chì quelli ch’avianu à difendelu l’arruvinanu sempre un pocu di più tutti i ghjorni.

Matteu Sambucucciu